Яруу найраг голын эрэг дээр

Яг л цэцэгс шиг алаглан дэлбээлдэг

Яруу найраг уулсын оройд

Яг л шувууд шиг жигүүрлэн дүүлдэг

Яруу найраг эрхсийн чуулганаас

Яг л мичид шиг анивчин гийдэг

Яруу найраг аяны харгуйд

Яг л дуу шиг гэгэлзэн хөвөрдөг

Яруу найраг өвгөдийн айлдвар шиг

Яг л голт судлаар минь урсдаг

Яруу найраг ээжийн энэрэл шиг

Яг л халамжлан тэвэрч угтдаг

Яруу найраг зүүдний ертөнцөөс

Яг л бэлэг шиг гэнэт ирдэг

Яруу найраг зүрхний гүнээс

Яг л булаг шиг боргилон ундардаг

Яруу найраг гудамж талбайд

Яг л дохио шиг анивчин угтдаг

Яруу найраг хүмүүний амьдралд

Яг л хамтдаа сүлэлдэн амтагддаг

Яруу найраг сэтгэлийг эзэмдэн

Яг л амраг шиг аминчлан учирладаг

Яруу найраг амьдрал жаргалаас

Яг л хөгжим шиг эгшиглэн хөглөдөг

Яруу найраг огторгуйн уудмаас

Яг л зураг шиг тодрон зурайдаг

Яруу найраг гунигийн шалбаагнаас

Яг л лянхуа шиг цэцэглэн мишээдэг

Э.ҮРЖИНХАНД